Hii ya Cristiano Ronaldo ni Kushiba Hela au Ndio Mapenzi Kwa Real Madrid?!

Achana na habari za Oscar pamoja na Tevez za kwenda kupiga hela kule nchini China. Jikumbushe kidogo kuhusu wachezaji wanaolipwa zaidi duniani kwa sasa ambao ni Cristiano Ronaldo na Lionel Messi. Kabla hilo halijakukaa kichwani fikiria hili la mchezaji aliyenunuliwa kwa bei kubwa hadi sasa ni Paul Pogba kwa kiasi cha €105 milioni.

Kweli China wameamua kuhamishia soka kwao kutokana na mchezo huo pendwa kuwa biashara ya halali namba moja duniani ambapo sasa kama Ronaldo ataamua kwenda China ataweka rekodi ambayo itaishi miaka mingi zaidi.

Wakala wa Cristiano Ronaldo amesema nyota wa Ureno na Real Madrid ametupilia mbali ofa kutoka klabu ya Ligi ya China ambayo amegoma kuitaja jina. Ofa hiyo ina thamani ya €300,000,000 sawa na $316,744,500 pamoja na mshahara wa €100 milioni sawa na $105,581,500 milioni kwa mwaka.

Akiongea na Sky Sports Italia Jorge Mendes amethibitisha kwamba klabu hiyo ipo tayari kuilipa Real Madrid ada ya uhamisho wa nyota huyo pamoja na mshahara huo mnono kwa Ronaldo.

Mendes amesema alipomwambia Ronaldo kuhusu ofa hiyo alijibu kwa kifupi tu akisema “Pesa sio kila kitu, Real Madrid ni klabu ya maisha yangu”. Hivyo maneno hayo yalionesha Ronaldo hana nia ya kushindana na Tevez au Oscar kwenye mshahara.