NOMA SANA! Hivi Ndivyo Wasanii Hawa Walivyotelekezwa Gesti!

 

Wasanii hao wakihojiwa.

Stori: Gladness Mallya, Risasi Jumamosi

DAR ES SALAAM: Kama hukuipata kwa kina habari ya wasanii 22 wa kucheza ngoma za asili kutoka Sumbawanga na Makambako, Risasi Jumamosi lina full stori ya wasanii hao ambao wamejikuta katika wakati mgumu baada ya kutapeliwa na kuletwa jijini Dar kwa kile walichoambiwa kwamba wanasafirishwa kuelekea nchini Misri kufanya shoo.

 

Chanzo makini kilieleza kwamba, wasanii hao walisafirishwa hadi na Dar na kutelekezwa katika nyumba ya kulala wageni iitwayo Ponde iliyopo maeneo ya Kigogo jijini Dar huku wakiwa na hali mbaya kwani walikuwa wakibangaiza fedha ya kula kwa kukata mauno kwenye baa mbalimbali huku wakisubiri mwenyeji wao awafanyie maandalizi ya kusafiri.

 

Baada ya kupenyezewa habari hizo, paparazi wetu alifika katika nyumba hiyo ya wageni ambapo watu hao walieleza kwamba waliletwa na mwenyeji wao waliyemtaja kwa jina la Paulo Joseph Sinkala ambaye aliwaambia anawapeleka Misri kwa ajili ya kucheza ngoma za asili.

Watu hao ambao wanne wametokea Sumbawanga huku 18 wakitokea Makambako, walisema Paulo alikusanya vitambulisho vyao wote na kusema kwamba anaenda kuwatafutia hati za kusafiria ambapo kuanzia walipofika jijini Dar Februari 12, mwaka huu hawaoni chochote kinachoendelea.

“Yaani hapa tumewekwa kwenye vyumba vitatu watu 22, tunalala kwa shida hata kula ni kwa shida ambapo imebidi tuwe tunafanya shoo kwenye baa mbalimbali walau tupate fedha kwa ajili ya kununua chakula,” walisema watu hao.

 

Barua walioiandika kwa Rais Dkt. John Pombe Magufuli kuomba msaada

Paulo alipoulizwa kuhusiana na suala hilo alisema kwamba yeye ni mwenyekiti wa kikundi hicho na alikuwa anafanya mpango wa kuwasafirisha wasanii wake hao kwenda kufanya shoo nchini Misri pia alionyesha barua aliyoandika kwa niaba ya wenzake kwa ajili ya kumfikia Rais John Magufuli.

Hata hivyo, ilielezwa kuwa Paulo aliwachangisha wenzake hao kati ya sh 80,000 na 150, 000 kwa kuwarubuni kuwa kupitia kikundi chake cha Wanyamwanga Simba Culture Group atawasafirisha kwenda kwenye tamasha la sanaa kwa ufadhili wa rais Magufuli na mke wa rais mstaafu, Jakaya Kikwete, Salma kitu ambacho hakikuwa na ukweli.

Paulo alishikiliwa na kituo cha polisi cha Magomeni jijini Dar kwa ajili ya kujieleza zaidi huku watu hao wakiwa wamebaki kwenye nyumba hiyo ya kulala wageni wakiwa hawana la kufanya.