CANNAVARO Aipa SIMBA SC Siku Saba

 

Beki wa kati wa Yanga, Nadir Haroub ‘Cannavaro’ .

Wilbert Molandi, Dar es Salaam
NDIYO kwanza amerejea uwanjani akitoka kuuguza jeraha la enka, lakini nahodha na beki wa kati wa Yanga, Nadir Haroub ‘Cannavaro’ amesema anahitaji siku saba tu za kuwa fiti tayari kuivaa Simba.

Beki huyo, alianza mazoezi ya pamoja na wenzake, Jumanne iliyopita jijini Dar es Salaam baada ya kumaliza programu ya mazoezi binafsi. Cannavaro alikuwa nje ya uwanja kwa zaidi ya miezi miwili.

Akizungumza na Championi Jumamosi, Cannavaro alisema mazoezi anayofanya hivi sasa ni kukimbia mbio ndefu na fupi pekee kabla ya kucheza mpira pamoja na wenzake.

Cannavaro alisema, anaamini kabla ya mechi ya Ligi Kuu Bara dhidi ya Simba itakayopigwa Februari 20, mwaka huu kwenye Uwanja wa Taifa Dar, atakuwa fiti kabisa kwani ataanza mazoezi magumu na wenzake.
“Nimeanza mazoezi wiki hii bado sijawa fiti kwa asilimia kubwa kwa maana ya kufanya mazoezi ya nguvu ikiwemo kucheza mpira kabisa.
“Nitakuwa na programu kwa siku saba pekee nitakayoimaliza kabla ya mechi ya Simba na kuanza mazoezi nikiwa fiti kwa ajili ya mchezo huo,” alisema Cannavaro ambaye yupo Mauritius na Yanga ambayo leo inacheza na Cercle de Joachim katika Ligi ya Mabingwa Afrika.