LINAH na Skendo ya Kuvuta Unga, Sigara!

Stori: Musa Mateja, Ijumaa
Dar es Salaam: Huku akitumia nguvu kubwa kukanusha, sexy lady anayefanya ‘fresh’ kwenye Bongo Fleva, Esterlina Sanga ‘Linah’ amegandwa na skendo ya kudaiwa kuvuta sigara, sambamba na matumizi ya madawa ya kulevya ‘unga’, Ijumaa limembana na lina habari kamili.

Awali, chanzo ambacho ni rafiki wa Linah kilidai kuwa, mwanadada huyo ambaye ni mmoja wa wasanii wa kike wenye mafanikio kwenye muziki huo kwa sasa, amekuwa akiongozana na marafiki ambao si wazuri na wamefikia hatua ya kumuingiza kwenye tabia zisizofaa ikiwa ni pamoja na utumiaji wa sigara na ‘mitungi’.

“Linah ni rafiki yangu sana lakini hakuna kitu kinachoniumiza kama kumuona anavuta sigara. Kuna mtu alinitonya juu ya tabia yake hiyo nikawa sikuamini lakini hivi karibuni niliona picha zake akiwa ameshika sigara anavuta bila wasiwasi.

“Mbaya zaidi naambiwa eti na yeye anatumia unga, kwa kweli yote naweza kumvumilia lakini kama kweli na kwenye unga kaingia, atakuwa anataka kupotea, ni vyema akaangalia upya marafiki zake.

“Zamani alikuwa rafiki mkubwa sana wa Recho (Winfrida Josephat), yule wa THT, naye mara nikasikia anavuta bangi, mara unga, nikasema Linah ajiangalie sana maana rafiki yako akiwa mwizi hata wewe ni rahisi kuwa mwizi,” alisema rafiki huyo wa Linah aliyeomba hifadhi ya jina gazetini.

LINAH ATAFUTWA
Kufuatia madai hayo mazito Ijumaa lilimtafuta Linah, alipopatikana alisema hayo ni maneno ya watu kwani yeye anajua kuvuta unga ni janga, hivyo hawezi kujiingiza huko.
“Jamani hilo suala la unga wala siyo kweli, hivi sijipendi kweli? Kama mimi natumia unga basi nife! Nawaona watu wanavyoangamia na janga hilo halafu mimi nijiingize huko, aah! Hilo haliwezekani,” alisema Linah.

Ijumaa: Inadaiwa baadhi ya mashosti zako wanaotumia unga ndiyo wanaokuponza na wewe kujikuta umeingia huko.
Linah: Siyo kweli bwana, hilo la unga siyo kweli ila la sigara siwezi kukataa saaana maana unajua wakati mwingine unapokuwa karibu na mashosti wanaovuta, unaweza ukaona siyo tatizo lakini wavutaji wa sigara wakiambiwa watoke mbele, mimi siwezi kutoka.

Ijumaa: Lakini kuna picha zako zinakuonesha unavuta sigara tena kwa ustadi wa hali ya juu.
Linah: Hizo nilizipiga ili nikaombe dili kwenye kampuni za sigara niwatangazie biashara lakini sikufanikiwa katika hilo.

Ijumaa: Sawa, ila isije ikawa lisemwalo lipo na kama halipo laja! Kumbuka mficha maradhi kifo humuumbua.
Linah: Mimi najitambua sana tena zaidi ya sana, siwezi kujiingiza kwenye mambo ambayo najua yanaweza kuniharibia maisha yangu. Nafanya muziki, watu wanipe sapoti kwenye hilo na wasizushe mambo ambayo hayapo.

Linah alikuwa shosti mkubwa wa Recho wa THT ambaye aliwahi kudaiwa kujiingiza kwenye utumiaji wa unga. Mwanadada huyo aliibuka na kukanusha madai hayo ila akakiri kuwa aliwahi kuvuta bangi, jambo lililowashangaza wengi.